’n Man (59) van Riebeek-Wes moet weer op 22 Junie op dwelmverwante aanklagte in die plaaslike landdroshof verskyn nadat hy Sondag 19 April met dwelms in sy huis betrap is.
Volgens sers. Henry du Randt, ’n polisiewoordvoerder, het lede van Malmesbury- en Riebeek-Wes-polisie met die hulp van Swartland se verkeer- en wetstoepassingseenheid ’n lasbrief by die verdagte se huis in Meerendalstraat uitgevoer. Du Randt sê die verdagte, wat glo berug is, is deur polisie- en verkeersbeamptes agternagesit toe hy verby hulle gery het. ’n Hoëspoed-jaagtog het gevolg tot by die man se huis, waar hy polisielede toegang tot sy erf geweier het.
’n Lasbrief is toe bekom waarna sy woning deurgesoek is.
Die hulp van die Boland-polisie en Swartland-verkeer se K9 honde-eenheid is ingewin om met die soektog te help. Altesaam 25 sakkies tik (8,25 g), 38 halwe Mandrax-tablette (32,20 g), 326 stoppe dagga en ’n swart vullissak met los dagga is binne en buite die huis gevind.
Die man is in hegtenis geneem en het Maandag 20 April vlugtig in die hof verskyn. Hy is vrygelaat op waarskuwing dat hy in Junie op die bogemelde datum weer in die hof moet verskyn.
