Coca-Cola in Suid-Afrika het mense gewaarsku om versigtig te wees vir ’n werksoekslenter wat in sy naam uitgevoer word.
Die maatskappy sê hy het gehoor slenters waarin mense wat beweer dat hulle verteenwoordigers van die maatskappy is, weer aan die toeneem is.
Die vals werksaanbiedinge kom van mense wat werksoekers op ’n bedrieglike wyse namens Coca-Cola teiken en beweer dat hulle vir die maatskappy werk of daarmee geassosieer word.
Met werkloosheid aan die toeneem, skep die desperaatheid van werksoekers ’n groot gaping vir werwing-swendelary.
Die patroon is dat swendelaars hulle as werwers voordoen en ’n maatskappy se identiteit of briefhoof valslik gebruik om niksvermoedende werksoekers te lok om te glo dat dit ’n wettige werkaanbieding is. Werksoekers word dan uit hul geld gekul deurdat hulle ’n voorafbetaling moet doen om kamstig in aanmerking te kom vir die werk.
Coca-Cola sê hy wil mense oor hierdie bedrogspul waarsku en vra dat, sou mense so iets teëkom, hulle dit by die owerhede aanmeld.
Die maatskappy sê hy sal nooit ’n fooi of betaling vra voor, tydens of ná die werwingsproses nie.
“Ons gebruik wettige, regverdige en formele werwingsprosesse wat aan alle wetlike vereistes voldoen.
“Sou iemand ’n werkaanbod van die maatskappy kry, sal enige kommunikasie van ’n verifieerbare Coca-Cola-bron kom,” sê ’n woordvoerder van die maatskappy.
Werksoekers word aangeraai om nie uitgelok te word deur enige kommunikasie wat betaling vra nie.
Indien mense twyfel of agterdogtig is oor ’n werksaanbod, moedig Coca-Cola hulle aan om die maatskappy direk by 0800 005 174 te kontak om te bevestig of die aanbod bestaan.
Verder kan werksoekers wat agterdogtig is oor enige bedrieglike aktiwiteite wat met werkaanbiedinge by Coca-Cola verband hou, die saak by hul naaste polisiekantoor aanmeld.
Die maatskappy sê hy sal saam met owerhede werk om hierdie bedrieglike aktiwiteit te beëindig.
