Hoërskool Swartland bied Saterdag 4 Desember sy eerste Old Boys- six-a-side-kriekettoernooi aan.
Die spanne wat gaan deelneem, sluit in Hoërskool Swartland, Hugenote Hoërskool, Paarl Boys High, Paarl Gimnasium, Hoërskool Durbanville, Hoërskool Stellenberg en Boland Landbou, asook ’n SA Legends-span.
Die SA Legends-span is opgemaak uit legendariese oudspelers wat steeds ’n passie vir die spel het. Spelers wat vir die span gekies is, moes op ’n tydstip vir Suid-Afrika of premierligakrieket in die klub gespeel het.
Die span word op die dag gelei deur Wayne Tharratt, wat die afgelope 34 jaar klubkrieket speel en steeds vir die Durbanville-krieketklub uitstap.
Vier wedstryde word in die eerste ronde, wat vooraf op 29 November se lotingsaamtrek bepaal is, gespeel. Die vier verloorders speel in die tweede ronde in twee plaat-halfeindrondes teen mekaar, en die vier wenspanne in twee beker-halfeindrondes.
Die spanne speel in die laaste ronde om hul posisie op die dag te bepaal.
Die verloorders in die twee plaat-halfeindrondes speel uit vir 7/8, die wenners in die plaat-halfeindronde vir 5/6 en die twee ander wedstryde bepaal die eerste tot vierde plekke.
Toeskouers kan uitsien na baie opwindende krieket met kosstalletjies vir elke smaak en springkastele om die jongspan besig te hou.
Darling Brewery is ook deel van die dag, maar kan as gevolg van Covid-19-regulasies sleg nie-alkoholiese drankies verkoop.
Toegang beloop R20 vir volwassenes (gratis vir kinders onder 18); kaartjies is beskikbaar by die hek. Die hekke open om 08:00.
Bring ’n gemaklike stoel saam.
Voorsiening word gemaak vir skaduplek vir die toeskouers en gratis parkering is op die skool se B-rugbyveld beskikbaar met toegang by die skool se hoofhek.
Alle Covid-19-regulasies soos in die Staatskoerant van 15 Oktober 2021 rakende skolesportgeleenthede, is van toepassing.
Die dag word moontlik gemaak deur die hoofborge, Ocean Processors Malmesbury en Nova Voere, saam met Loubsers Transport, JB’s Nissan, Swartland Winery, Têkkel Talk Show en William Koch Prokureurs.
Swartland Gazette is die trotse mediaborg.
