Die verkope van jenewer het die afgelope jaar drie keer meer as dié van enige ander soort drank gestyg.
Jenewer is nou net so gewild soos whiskey en het wodka en brandewyn verbygesteek, sê Pick n Pay.
Die winkelgroep sê dis nie verbasend nie dat Statistiek Suid-Afrika jenewer pas ingesluit het in die mandjie produkte waarvan die pryse dopgehou word en op grond waarvan die land se inflasiekoers bepaal word.
Nie eens die verbod op drankverkope het die neiging gestuit nie, sê Gavin Ievers, hoof van Pick n Pay se drankafdeling. Hy sê mense het eenvoudig na alkoholvrye jenewer oorgeslaan.
Dis so gewild dat Pick n Pay nou meer as 100 variëteite in sy drankwinkels het teenoor net sowat 20 tien jaar gelede.
Ievers sê nuwe jenewers word byna maandeliks aan hulle bekendgestel. Dit skep ’n uitdaging om rakruimte te kry.
Sowat ’n kwart van die jenewer op die rakke van Pick n Pay word plaaslik geskep.
Ook in ’n onlangse peiling dui die BrandMapp-verslag aan dat die gemiddelde middelklas Suid-Afrikaner nou baie meer geneig is om ’n glasie jenewer te skink as om ’n blikkie bier oop te knak.
Vir die opname is meer as 33 000 Suid-Afrikaners met ’n inkomste van meer as R10 000 per maand oor hul drankverbruik uitgevra.
Altesame 43% van die respondente het gesê hulle drink wyn, 33% drink jenewer en net 28% het aangedui dat hulle bier verkies.
Hier volg ’n paar wenke van hoe jy jou jenewer kan opkikker:
Gin fizz
• Ysblokkies
• 60 ml droë jenewer
• 120 ml vars uitgedrukte suurlemoensap
• Sodawater
• Suurlemoen- of lemmetjieskywe
• Vars kruisementblare
Sit ysblokkies in twee glase. Verdeel die jenewer en vars suurlemoensap tussen die glase en vul dit dan met soda. Garneer met lemmetjieskywe en kruisementblare.
Bloubessie en suurlemoen gin fizz (vier skemerkelkies)
• Bloubessies
• 20 kruisementblare
• 2 suurlemoene
• ¼ koppie eenvoudige stroop
• 355 ml jenewer
• Sodawater
• Ysblokkies
Sit in elke glas vier bloubessies, vyf kruisementblare, die sap van ’n halwe suurlemoen en een teelepel eenvoudige stroop.
Meng die bestanddele totdat die swartbessies fyngedruk is.
Vul die glase met ysblokkies. Giet ongeveer 85 ml jenewer in elke glas en roer deur.
Bedek met soda en versier met suurlemoenskyfies, heel bloubessies en kruisementblare.
Jenewer en grenadella fizz
• 60 ml jenewer
• 1 grenadella
• kinawater (tonic; gewone)
• Ys
Sit die jenewer in ’n lang glas. Sny die vrug oop en met ’n teelepel, skep die pulp in die glas saam met die jenewer. Vul glas met ys en dan tot bo met kinawater.
